Вахит авылын су басты

Районыбыздагы Вахит авылының бер өлеше су астында калды. 1979нчы елдагы хәл тагын кабатланган. Ул чакта да торак пунктнын өчтән ике өлешен бер метр тирәнлегендә су каплаган иде, ди өлкәннәр. Шыя ярына терәлеп диярлек урнашкан Вахит авылы районыбызда су басу куркынычы булган авылларның берсе. Әле 20-25 еллар элек авылны һәр язда су баса иде, дип сөйлиләр. Әмма соңгы елларда табигать мондый сюрпризлар күрсәтмәгән. 9нчы апрельдә кинәт күтәрелгән су авылга алып керүче күтәрелгән дамба юлын кумеп, Вахит дөньядан аерылып калган. Торак пунктны цивилизация белән тоташтыруда коткаручылар күп көч куйды, ди Илһам Хафизов.