Тәлгать Самат улы Нәҗмиев 1950 елның 1 мартында Татарстанның Кукмара районы Байлангар авылында колхозчы гаиләсендә туа. 1967 елда шул авыл урта мәктәбенең тугызынчы сыйныфын тәмамлаганнан соң, унҗиде яшьлек егет, күрше Саба районының Шәмәрдән эшчеләр бистәсенә килеп, шундагы промкомбинатның клуб мөдире булып эшкә урнаша. Армия Сафларында хезмәт иткәннән соң, Саба район башкарма комитетының мәдәният бүлеге карамагындагы автоклуб мөдире булып эшли. 1972-1975 елларда үзе оештырышкан җирле радиотапшырулар үзәген җитәкли. Шул елларда Т.Нәҗмиев читтән торып укып Казан дәүләт университетының татар теле һәм әдәбияты бүлеген тәмамлый.
1981 елдан 2008 елга кадәр (барлыгы 27 ел) Тәлгат Нәҗмиев район газетасына баш мөхәррире була. Тәлгат Самат улы эшләгән чорда моңа кадәр "Кызыл Байрак" дип аталган газетаның исеме "Саба таңнары" дип үзгәртелә.
2008 елда Тәлгать Самат улы сәламәтлеге какшау сәбәпле "Саба таңнары" җитәкчелегеннән китә. Әмма иҗат белән яшәвен дәвам итә. Аның кулларыннан мөхәррирлек дилбегәләрен кабул итеп алган Рөстәм Габдерәүф улы Исмәгыйлов сүзләренчә, аның ярдәме һәрдаим сизелә. Лаеклы ялга киткәннән соң да, Тәлгать Нәҗмиевның күпсанлы язмалары «Саба таңнары" битләрендә дөнья күрә. Шулай ук ул "Мишә дулкыннары" берләшмәсенә икенче сулыш бирә. Язучылар, шагыйрьләрнең яшьләр белән очрашуларын оештыра. "Өлкәннәр клубы"нда да тыгыз эшчәнлек алып барган.
- Тәлгать Саматович кешелеклелек сыйфатлары ягыннан да, алып барган эшчәнлеге ягыннан да гаҗәеп кеше иде. Шаян-тапкыр сүзләре белән һәркемнең кәефен күтәрергә тырыша иде. Гомере буен иҗатка бөтен күңелен биреп яшәде. Соңгы ике айда гына Тәлгать Саматовичның кәефе китеп, эшчәнлектән читләште, - ди Рөстәм Исмәгыйлов.
Тәлгат Нәҗмиев киң даирә укучыларга публицистик язмалары һәм мәзәк жанрындагы кыска хикәяләре белән мәгълүм. Ул - Саба районының күренекле шәхесләре, алтын куллы һөнәр ияләре, шушы төбәктән чыккан язучылар, сәнгать һәм фән эшлеклеләре турында язган күпсанлы очерклар, каләмдәшләре Мәгъсүм Хуҗин, Мөнир Абдуллиннар белән хезмәттәшлектә иҗат иткән районның үткәнен һәм бүгенгесен яктырткан тарихи-публицистик китаплар авторы.
Журналистика өлкәсендәге уңышлары һәм актив җәмәгать эшчәнлеге өчен Тәлгат Нәҗмиев 1990 елда «Татарстан Республикасының атказанган мәдәният хезмәткәре» дигән мактаулы исемгә лаек була. Ул Татарстан журналистларының Х.Ямашев исемендәге бүләге һәм «Бәллүр каләм» призы иясе. Т.Нәҗмиев - 2001 елдан Татарстан Язучылар берлеге әгъзасы.
Мәрхүм белән хушлашу бүген сәгать 14.00 сәгатькә билгеләнгән. Урыны ожмахта булсын. Ходай гаиләсенә сабырлыклар бирсен.
Мәгълүмат чыганагы: http://intertat.ru/
Нет комментариев