Мамадыш юлларын пресс–плита белән тигезлиләр

Бу көннәрдә коммуналчыларның бер бригадасы шәһәр урамнарындагы юлларда чокырлар ремонтын башлап җибәргән иде. Төзекләндерү эшенә Давыдов урамында керештеләр.

Асфальттагы тишекләргә пломба салу белән 6 кешелек бригада шөгыльләнә. Ремонт урынында ике "МТЗ-82" тракторы эшли.

-Иң элек чокыр урынын фреза белән тигезләп кырып алабыз. Ул урын ун сантиметр тирәнлектә чистартыла һәм яхшылап җылытыла. Алга таба аны битум мостикасы белән эшкәртәбез, соңыннан коры асфальт җәелә,- ди юл хезмәткәре Валерий Бочков.

Иске асфальтны трактор арбасына җыеп баралар. Аның урынына салынган яңа чимал җылытылганнан соң, пресс-плита белән 10 минут дәвамында ныгытыла. Ремонтчылар әйтүенчә, әлегә юлдагы асфальт салкын. Димәк, аны җылыту озак вакытны ала. Шунлыктан, әлегә көнлек эш күләме дә 50-60 квадрат метрдан артмый, диләр. Ә гомумән, бу сезонда 1000 квадрат метр мәйданда чокырлар ремонты алып бару бурычы тора. Һава торышы яхшыруга әлеге эшләр Толстой, Домалазов һәм Ленин урамнарында дәвам итәчәк.