Ләкләк бәби өләшә

Шәһәрдәшләребез Ленара һәм Илнар Мөхетдиновларның Зәринәләре, Надежда һәм Рөстәм Батырхановларның Ульяналары, Надежда һәм Рузил Даутовларның Радиклары, Гөлия һәм Ленар Гаязовларның Ринаслары тумас борын никадәр ыгы-зыгы тудырды! Алсу Спиридонова Кайчан туасын белгән бу сабыйлар: 8нче июль-Гаилә, мәхәббәт, тугрылык көненә турылаганнар. Шул уңайдан җомга көнне район үзәк хастаханәсенең бала тудыру йортыннан берьюлы дүрт нарасыйны тантаналы төстә өйләренә озаттылар. "Исемнәре дә берсеннән-берсе позитив яңгырый. Ульяна-бәхет, Зәринә-алтын белән йөгертелгән, Радик-кояш нуры дигән мәгънәгә ия. Инсафлы, тәүфыйклы балалар булсыннар, туган илебезнең ватандарлары булып үсеннәр,"-дип, муниципаль район башкарма комитеты җитәкчесенең социаль мәсьәләләр буенча урынбасары Алена Смирнова, ЗАГС мөдире Фәния Әхмәтшина әлеге гаиләләргә иң изге теләкләрен җиткерделәр, истәлекле бүләкләр тапшырдылар. Бәхетле әтиләрнең мәхәббәт чәчкәләрен-ал һәм зәңгәр бантиклы җанлы төенчекләрен тәүге кат кулларына алган мизгелне үз күзләрең белән күрергә кирәк! Әби-бабайлар да биредә. Мәһдүдә Даутованың дүртенче оныгы икән инде. "Өч кыздан соң бер малай,"-дип, ул да сөенече белән уртаклашты. Классташым, ике кыз әтисе Рафис Сөләйманов та бабай булган. Оныгыннан күзен алмый. Кияве Ленарга үз итеп: "Кызыңны күтәр,"-дигән идем. "Нинди кыз?! Малай бит минем!"-дип шәрран ярды. "Ә, ярар, икенчесе кыз булыр алайса. Анысы кыйммәтрәк йөри, туганда ук-"бизнес-леди!". Ана капиталы да бирәләр,"-дип ярымшаяртып, ялгышымны төзәтергә туры килде. Эчке бүлмәдә сабыйларны биләүгә бәйләп, әтиләренә тапшырып торган шәфкать туташы Ирина Мансурова эшен бетереп чыкты: "Менә шулай көн дә бәби өләшәбез. Бәхетле ата-аналарны күрү күңелгә сөенеч өсти, эшләү дәртен арттыра. Пар канатлы, бәхетле булсыннар!"- диде "кендек әбисе". Әйе, малайларга да, кызларга да, барыбызга да сикәлтәсез, бәхетле тормыш юлы үтәргә язсын. Юлларга- ак җәймә!