Урта Кирмәннең шигъри җанлы “Ак калфак“лары

 Китапханәче, авыл “Ак калфак“лары җитәкчесе Лилия Нәгыймова һәм мәдәният йортының сәнгать җитәкчесе Ләйлә Абдуллинаның фантазияләре бик бай. Бөтен авыл халкын кузгатканнар.  “Газизләрдән газиз әнием“ дип исемләнгән әдәби-музыкаль кичә “Кич утыру“  күренеше белән башланып китте. Анда ярты авыл хатын-кызы катнашты. Шулай ук каләм тибрәтүчеләр белән очрашу да бик күңелле булды. Мәгариф ветераннары – Гөлфәридә Шәрипова, Рузилә Гатина, Гөлүсә Гаянова үзләренең иҗатлары белән таныштырдылар. Алар барысы да – “Ак калфак“лылар! Районнан кунакка килгән җирле шагыйрә һәм җырчы Илгизә Нәзированың чыгышы нур өстенә нур булды.

Соңыннан, бергәләшеп мәҗлес табыны артында бәлеш белән сыйландылар, мәтрүшкәле чәй эчтеләр. Рәхәтләнеп әңгәмә кордылар. “Мондый очрашуларны ешрак уздырырга кирәк!“ – дигән теләк белән таралыштылар. Алга таба планнар зурдан, тик әлегә сер булып кала...