Иң кечкенәсенә 4 яшь, иң өлкәненә – 75: меңләгән мамадышлы чаңгы юлларына чыкты

Диләрә Фәтхуллина өчен бу әле беренче зур ярыш. Мамадышның “Бәләкәч” балалар бакчасында тәрбияләнүче кыз алдында район дәрәҗәсендә сынатмау бурычы тора.

–Чаңгыда шуарга бик яратам, - ди Диләрә. Бүген ул финишка икенче булып килде.

Ә Денис Иванов чаңгы спорты белән соңгы 3 елда ныклап шөгыльләнә. “Кәефләр яхшы. Иң мөһиме – һава торышы шәп!” – ди егет.

“Татарстан чаңгы юлы - 2021” исеме астында узучы массакүләм спорт чарасы өчен берничә дистанция әзерләнгән. Хөкемдар Вәсимә Имамова әйтүенчә, иң кечкенәләр 250 метр арада ярышачак. Ә иң зур дистанция 5000 метрга тигез.

Чаңгы ярышы өчен яшь чикләүләре юк. Биредә теләгән һәркем катнаша ала. Трассага чыккан мамадышлыларның иң кечкенәсенә 4 яшь булса, иң өлкәннәр – 8нче дистәләрен ваклаучылар иде. 73 яшьлек Хәлим абый Сәлимов та стартка әзерләнә.

–Чаңгы ярышларында мәктәп елларыннан бирле катнашып киләм. Без монда Гаян Гасыймов белән икәү инде, һәрдаим катнашучылар, - ди спорт ветераны.

Ярыш нәтиҗәләре буенча призлы урыннарны алучыларга медаль һәм мактау кәгазьләре, ә җиңүчеләргә боларга өстәп бәйгенең символикасы төшерелгән башлыклар да бирелә.