Зиннур Тукайны кайчан күргән

Татарстан китап нәшриятендә якташыбыз, Татарстанның халык шагыйре, Габдулла Тукай премиясе лауреаты Зиннур Мансуровның "Тукай белән әңгәмәләр. Беседы с Тукаем" исемле җыентыгы дөнья күрде.

Татар һәм рус телләрендә киң катлау укучыларга тәкъдим ителгән әлеге китапка татар халкының иҗтимагый яшәешен төрле яссылыкта чагылдырган тематик әңгәмәләр, публицистик язмалар туплап бирелгән. Аларда бөек шагыйребез Габдулла Тукайның газиз милләтенә багышланган даһилыгы янә бер мәртәбә яңача ачылып китә. Шагыйрьнең күпьеллык эзләнүләре нәтиҗәсендә язылган "Тукайча татар кодексы" хезмәте дә республика җәмәгатьчелеге тарафыннан моңарчы күрелмәгән яңалык буларак кабул ителде. Китап Габдулла Тукайның тормышына һәм иҗатына багышланган рәсемнәр һәм фотолар тупланмасы белән дә баетылган.