Изге сәфәр

9 райондашыбыз Хаҗга китте. Булачак хаҗилар-барысы да бу изге сәфәргә беренче мәртәбә баручылар. Аларның икесе стандарт тур белән кичә киткән иде, җидесе, сакчыл (экономияле) турны сайлаганнары, бүген юлга кузгалды. Иң элек алар шәһәрнең үзәк мәчетендә моңа кадәр Хаҗ кылган райондашлар белән очраштылар. Соңгылары юлга чыгучыларга үзләренең киңәшләрен җиткерделәр. Аннан намаз укылды һәм сәфәрчеләр автобуска утырып Казанга юл тотты. Башкалага кадәр аларны үзәк мәчетнең имам-хатыйбы Наил хәзрәт Вахитов озата китте. Хаҗга баручыларның барысы да-өлкән буын вәкилләре. Арада ирле-хатынлылар да, апалы-сеңеллеләр дә, туганнан-туганнар да бар.