Татарстан юлчылары чаңгы трассасында

Беренче карашка, яңгыр һәм көчле җил астында чаңгыга басу мөмкин эш түгел кебек. Әмма басу гына түгел, ә берничә километр араны да узарга була икән. Моны 16нчы март көнне шәһәр стадион-ипподромында исбатладылар. "Татавтодор" ААҖ-нең 10 филиалы хезмәткәрләре җитезлектә ярышты. Җиңүче исеме өчен Аксубай, Апас, Арча, Чүпрәле, Мамадыш, Минзәлә, Түбән Кама, Шәһәр яны, Саба һәм Чаллы командалары көрәшә. Беренче булып трассага 18 яшьтән- 35 яшькәчә булган хатын-кызлар басты. 2 км. арада шәһәрдәшебез Алия Госамовага тиңнәр юк.

- Бүген мин беренче булдым. Моңа бик шатмын, әлбәттә. Көндәшләр бик көчле иде. Яхшы әзерләнгәннәр. Әмма моңа да карамастан, яхшы күрсәткечкә ирешә алдым,- ди Алия Госамова.

Шулай ук 2 км. арада узышкан 35 яшьтән 45 яшькәчә хатын-кызлар арасында да безнең спортчыбыз лидер. Ленуза Мөбарәкшина барлык көндәшләрен дә артта калдырды. Алга таба трассага 45 яшь һәм аннан өлкәнрәк хатын-кызлар чыкты. Бу төркемдә дә безнекеләр беренче өчлектә иде.

Ярыш барышын башкала кунаклары да күзәтте.

Ир-атлар төркемендә дә уңышларыбыз бар. 3 км. арада узышкан 18 дән 35 яшькәчә спортчылар арасында Мамадыш командасы вәкиле Сергей Петровка тиңнәр булмады.

Гомумкоманда беренчелегенә килгәндә, 3нче баскычта Арча районы юлчылары. Икенче баскычта 4 медаль яулаган мамадышлылар. Ә пьедесталның иң югары баскычында Минзәлә командасы. Алар исәбендә 5 призлы урын.

Кунаклар бу көнне спорт ярышыннан тыш, Май чабу бәйрәмен дә билгеләп үттеләр. Республика юлчылары коймактан авыз итте, карачкы яндырды.