Ярминкәгә суыклар киртә түгел

Шәһәребездәге быелгы соңгы ярминкәне Кирмән зонасы үткәрде. Иртәнге якта термометрлар минус 30 градус күрсәтүгә дә карамастан, сәүдәне башлап та җибәргәннәр иде инде алар. "Бу юлы халык сөт һәм сөт продуктларын бик тиз алып бетерде,"-ди Уразбахты җирлеге башлыгы Рәфкать Кәримов. Әлеге авылдан Ибраһим Исмәгыйлов белән Фәрит Сәгъдиев күп итеп каз түшкәләре дә алып килгәннәр иде. Гомумән бу ярминкәдә каз һәм бозау итләре бик күп сатылды. Моны сәүдә рәтләре белән танышкан комиссия вәкилләре дә билгеләп үтте. Ә Түбәнякеләр, гадәтләренә тугры калып, бик күп итеп пешкән әйберләр алып килгәннәр. Сәвия Шиһапованың өстәленнән ярминкә буе кеше өзелмәде. Кайнар чәй, пешкән әйберләр белән бик күп мамадышлыларны сыйлады ул. "АПК "Азык-төлек программасы" өч машина белән салам, печән, ашлык китергән. Алар да барлык әйберләрен сатып бетереп кайтып киттеләр.