Мәшгульлек үзәкләре эш урыннары булдырырга тиеш!

Муниципалитет бинасының утырышлар залына җыелган кунаклар өчен иң элек Мамадыш районы мәшгульлек үзәге коллективына багышланган фильм тәкъдим иттеләр. Безнекеләрнең нинди шартларда эшләвен күпләр ак көнләшү белән карап утырды. Яңа бинаның тагын берсе быел республиканың Биектау районында да ачылган икән. "Мәшгульлек үзәкләре- иң кирәкле хезмәтләрнең берсе. Бирегә кешеләр үзләренең проблемаларын чишәргә дип килә",- диде район башлыгы Анатолий Иванов, кунакларны сәламләү чыгышында. Аның ассызыклавынча, бу тармак белгечләре кешеләргә хезмәт урыннары тәкъдим итәргә генә түгел, ә яңа ваканцияләр булдыруга да өлешләрен кертергә тиешләр.

- Бүгенге көндә авылларыбызда эшсезләр санын киметү зарур. Теләгән кешегә барлык шартлар да бар. Техникалар алар өчен эшли. Терлек азыгы кайтару белән дә проблемалар юк. Шәһәрдә дә хезмәт урыннары булдыру буенча максатчан эш алып барырга кирәк,- дип искәртте Анатолий Иванов.

Хәзерге вакытта районда теркәлгән эшсезләр саны 300 дән артып китә. Бу икътисади актив халыкның 1,5 проценты дигән сүз. Киңәшмәдә катнашкан ТР хезмәт, халыкны эш белән тәэмин итү һәм социаль яклау министры урынбасары Клара Тәҗетдинова хәбәр итүенчә, әлеге сан республика буенча 3,8 процентны, ә ил күләмендә 5,2 процентны тәшкил итә.

- Татарстанда соңгы елларда мондый күрсәткеч юк иде әле. Без минимумга ирешә алдык. Республика буенча рәсми теркәлгән эшсезләр саны 20 меңгә генә калды. Ә аның 60 мең чиген узган вакытлары да бар иде бит,- ди Клара Тәҗетдинова.

Елның шушы чорына республикада 33 меңнән артык вакансия бар. Бу бер урынга 0,7 кеше дигән сүз. Киңәшмәдә эш урыннары бирүчеләрнең хезмәткәрләренә булган бурычлары хакында да сөйләштеләр. Аның күләме 63 млн. сумнан артып киткән. Клара Тәҗетдинова ассызыклавынча, хәзерге вакытта беренче урынга кадрлар кытлыгы проблемасы килеп баса. Бу юнәлештә мәшгульлек үзәкләре мәгариф оешмалары белән бер булып эшләргә тиеш. "Укучылар өчен махсус урта, югары уку йортлары, төрле оешма вәкилләре белән очрашулар үткәрегез. Аның әһәмияте зур булачак!"- диде министр урынбасары. Район башкарма комитеты җитәкчесенең урынбасары Алена Смирнова төбәгебездә тормышка ашырылучы "Тормыш дәресләре" программасын киңәшмәдә катнашучыларга үрнәк итеп китерде. Әлеге чара барышында Әлмәт һәм Чистай районнарының мәшгульлек үзәкләре директорлары эш тәҗрибәләре белән дә уртаклаштылар. Соңыннан республиканың иң яхшы 12 мәшгульлек үзәген игълан иттеләр. Исемлектә Мамадыш та бар иде. Безнекеләр авыл районнары арасында 1нче урынны яулаган. Коллектив җитәкчесе Сергей Плакатновка бүләкләр белән беррәттән күчмә кубок та тапшырдылар. Тантананы истәлеккә фотога төшү һәм шәһәр буенча экскурсия дәвам итте. Азактан директорлар өчен 87нче санлы ҺК базасында укулар узды.