Мамадыш эшмәкәре папаха киде

Түбән Ушма авылында эшмәкәр Рифат Мотыйгуллин призына ирекле көрәш буенча икенче мәртәбә Бөтенроссия турниры узды. Ике көн дәвамында келәмдә Россиянең төрле төбәгеннән килгән 250 дән артык көрәшче бил алышты. Бәйгенең төп мизгелләре безнең репортажда.
Рифат Мотыйгуллин оештырган Бөтенрәсәй турнирына спортчылар гына түгел, ә сәнгать кешеләре дә килгән иде. Кавказ халыклары биюен Дагыстаннан килгән кунаклар башкарды. Әлеге республиканың Махачкала, Хасавюрт шәһәрләреннән составында 41 кеше булган өч команда килгән.
Бәйгеләрне ачу тантанасында кавказлылар безнекеләрнең каравай һәм чәк-чәк белән сыйлавына каршы районыбыз башлыгы Анатолий Ивановка милли горурлыклары булган кинжал бүләк иттеләр, Рифат Мотыйгуллинның башына папаха киерттеләр, җилкәләренә бурка салдылар.